പലസ്തീന്റെ മേൽ തുടരുന്ന വംശീയ ധ്രുവീകരണം, നെതന്യാഹുവിന്റെ അഴിമതിമുഖം മറച്ചു വക്കാനുള്ള ശ്രമം: പലസ്തീൻ അംബാസഡർ

പലസ്തീൻ ജനതക്ക് മേൽ ഇസ്രായേൽ തുടരുന്ന ആക്രമണങ്ങൾ തന്റെ രാഷ്ട്രീയ താൽപര്യങ്ങൾ സംരക്ഷിക്കുവാനും തനിക്കെതിരെ നിലനിൽക്കുന്ന അഴിമതി വിവാദങ്ങൾ മറച്ചുവെക്കുവാനുമുള്ള ഇസ്രായേൽ പ്രധാനമന്ത്രി ബെഞ്ചമിൻ നെത്യനാഹുവിന്റെ പൈശാചിക ശ്രമമാണെന്ന് ഇന്ത്യയിലെ പലസ്‌തീൻ അംബാസഡർ അബ്ദുള്ള അബു ഷാവേഷ്.
കേരള മീഡിയ അക്കാദമി നടത്തുന്ന അന്താരാഷ്ട്ര മാധ്യമോത്സവ വേദിയിൽ പ്രശസ്ത മാധ്യമ പ്രവർത്തകൻ വെങ്കിടേഷ് രാമകൃഷ്ണനുമായി നടന്ന സംവാദത്തിൽ സംസാരിക്കുകയായിരുന്നു അദ്ദേഹം.
പലസ്തീൻ ജനത നേരിടുന്ന യുദ്ധവും വംശഹത്യയും അടങ്ങുന്ന വിഷയങ്ങളിലൂന്നിയായിരുന്നു സംവാദം. പലസ്തീൻ-ഇസ്രായേൽ വിഷയത്തിൽ ആദ്യഘട്ടം മുതൽ അന്താരാഷ്ട്ര മാധ്യമങ്ങൾ പുലർത്തിവന്ന ഇസ്രായേൽ പക്ഷം ചേരൽ വിമർശിച്ച അദ്ദേഹം, ഗാസയിൽ കൊല്ലപ്പെട്ട മാധ്യമ പ്രവർത്തകരുടെ ധീരോജ്ജ്വലമായ ത്യാഗങ്ങളെ സ്മരിക്കുകയും ചെയ്തു.